Cenazeyê Abdulsamet Çelîk ê ku ji ber nexweşiya pençeşêrê demek berê ji girtîgehê serbest hat berdan û li Nexweşxaneya Zanîngeha 9 Eylulê dermankirina didomiya serê sibê jiyana xwe ji dest da ji nexweşxaneyê hate wergirtin û anîn Mizgefta Şêx Muhammed a Çamlika Kevin a Karabaglarê. Piştî wecîbeyên olî  ji bo Çelîk meş hate lidarxistin. Darbesta Çelîk a bi ala PKK'ê hat pêçandin ji aliyê girseyê ve hate hilgirtin û di meşê de posterên Rêberê Gelê Kurd Abdullah Ocalan û wêneyên Çelîk hatin hilgirtin û dirûşên, "Şehid namirin" hatin berzkirin.

Piştî meşê cenazeyê Çelîk li Goristana Kaynaklar a Bucayê hate definkirin. Piştî karên definkirinê Hevserokê TAYD-DER'a Îzmîrê Musa Karbadag axivî û diyar kir ku dewlet di mijara girtiyên nexweş de xemsar nêzîk dibe û ji girtîgehan darbest hê derdikevin. Hevseroka Rêxistina HDP'ê ya Îzmîrê Mizgîn Irgat jî diyar kir ku divê demildest girtiyên nexweş serbest bên berdan û wiha got: "Soza me ji rêheval Samet re, gelê kurd dê azadiya xwe qezenc bike."

Dayika Çelîk Halîse Çelîk jî diyar kir ku Çelîk şehîdê hemû gelê Kurd e û wiha got: "Samet 20 sal bû hêz dida min. Niha jî ez li ser piyan im. Samet îro şehîdê gelê Kurd e. Serê gelê Kurd sax be. Şehîd namirin."