Kobaniyên ji ber hewldanên komkujiyê yên çeteyên DAIŞ'ê neçar man cih û warê xwe biterikînin, kom bi kom li Kobanê ya ji aliyê şervanên YPG/YPJ'ê ve hat azadkirin, vedigerin. Kobaniyên 6 mehan li derveyî warê xwe jiyan, tevî hemû daxuyanî û hişyariyan jî, li cih û warên xwe vedigerin. Ji destpêka êrîşan û pê ve nêzî 200 hezar kes, bi alîkariya Şaredariyên DBP'yî û welatiyan re, di serî de li Pirsûsê li kamp û malan hatin bicihkirin.

BI QASÎ 40 HEZAR KOBANIYÎ VEGERIYAN

Ji 20 hezar Kobaniyên li wargehên Arîn Mîrxan, Rojava, Sûphî Nejat Agirnasli, Kobanê, Kader Ortakaya û Şehîd Gelhad diman, nîvê wan ev wargeh terikandin û vegeriyan Kobanê. Ji 26'ê Çileyê roja azadkirina Kobanê ji aliyê hêzên YPJ/YPG'ê û vir ve, ji Pirsûsê bi qasî 40 hezar Kobaniyî vegeriyan Kobanê. Di rojên ku Deriyê Sînor ê Kobanê ya Serxetê vekiriye de, bi hezaran Kobaniyî ji bo vegerê dikevin rêzê û tevî hemû zor û zehmetiyan vegera li cih û warên xwe tercîh dikin.

'EM Ê TI CARÎ NETERIKÎNIN'

Kobaniyî piştî çêkirina qeydê, ji bo careke din vegerin dikevin nava Kobanê. Yên di rêza vegerê de ne destnîşan dikin ku ew ê Kobanê biparêzin û ti carî ji çeteyan re nehêlin. Ciwanên ji bo vegerê ketine rêzê dibêjin, "Em ê careke din neterikînin û bi canê xwe em ê wê biparêzin."